Bjart eða svart framundan í atvinnumálum leiðsögumanna?

Fagmenntaðir leiðsögumenn skiptast í tvo jafnstóra hópa í afstöðu sinni um atvinnuhorfur næsta sumar, ef marka má niðurstöður netkönnunar á forsíðu Félags leiðsögumanna.

 

Spurt var hvort fagmenntaðir leiðsögumenn hefðu áhyggjur af atvinnumöguleikum næsta sumar. Fjórðungur þáttakenda er mjög sammála en fimmtungur er því mjög ósammála. Ef tekið er mið af þeim sem eru "mjög sammála" og "sammála" annars vegar og þeirra sem eru "ósammála" og "mjög ósammála" hins vegar - þá eru hóparnir nær jafnstórir.

Af niðurstöðunum að dæma virðist sem leiðsögumenn séu á mjög öndverðri skoðun hvað atvinnumöguleika næsta sumar varðar.

Niðurstöður í prósentuhluföllum voru þessar:

 

·             26 - mjög sammála

·             19 - sammála

·             12 – hvorki né

·             22 – ósammála

·             21 – mjög ósammála

 

Könnuninni svöruðu 123 í opinni skoðanakönnun á heimasíðu Félags leiðsögumanna 21. nóvember 2008 til 16. janúar 2009.

 

Heimasíða Félags leiðsögumanna, smellið hér.

 

Athugasemdir

[Alma Jenny Guðmundsdóttir, 17.1.2009 kl. 23:06]

Var þá fjórðungur með áhyggjur af atvinnumöguleikum sínum en fimmtungur ekki?

 Sjálf er ég ferðamálafræðingur (diploma) og eftir því sem hagspár - eins nákvæmar og þær geta verið, hafa verið að sýna, þá fer efnahagsástand mjög versnandi víða í heiminum.

Þau 10  lönd sem Economist taldi upp sem þau lönd þar sem hagvöxtur verður mestur á komandi ári,  voru lönd í Mið-austurlöndum Katar í fyrsta sæti - og eitthvert Afríkuríkið o.fl.

Þá voru Kínverjar í 5. sæti.  Ath. yfir lönd þar sem hagvöxtur verður mestur.

Þau lönd þar sem hagvöxtur verður minnstur eru m.a. BNA, Bretland, fleiri Evrópuþjóðir sem og afríkuríki.

Í næst neðsta sæti listans er Zimbabve

Í neðsta sæti listans er Ísland.

Mér sýnist að þau lönd þar sem Íslendingar hafa markaðssett sig, séu að fara mjög illa út úr kreppunni og ferðalög er jú vara sem fólk gefur upp á bátinn í efnahagsþrengingum.

Mín spá er því sú að ferðaþjónustan eigi eftir að finna vel fyrir þessu, þrátt fyrir hagstætt gengi fyrir flesta hér á landi, þá bara kemst venjulegt fólk sem hingað hefur sótt, ekki út fyrir eigið land.  Þeir ferðamenn sem mest sækja til Íslands, er yfirleitt vel menntað, miðaldra fólk.  Því miður er það svo víðar í honum vestræna heimi að menntun hefur verið umtalsvert gjaldfelld á kostnað 2ja til 3ja greina, svo sem viðskiptafræði, hagfræði og lögfræði - svo ekki er ævinlega samasem merki á milli menntunar og fjármagnseignar.

[Stefán Helgi Valsson, 17.1.2009 kl. 23:54]

Sæl Alma, takk fyrir innleggið og ábendinguna.  Ég lagaði textann.

Sumir eru mjög svartsýnir um framtíð ferðaþjónustunnar á Íslandi og það réttilega. Eflaust eiga sumir eftir að gera það gott en eflaust eiga sumir erfitt ár í vændum.

Án þess að hafa allar forsendur á hreinu er það mín tilfinning eftir 22 ár í bransanum, að við komum til með að sjá jafn marga erlenda ferðamenn á Íslandi á næsta ári og því nýliðna. Hins vegar munum við einingis fá helminginn af tekjum ársins í fyrra.

Mín tilfinning er að erlendir ferðamenn vilji áfram koma hingað en séu að leita að ódýrum lausnum og styttri ferðum. Mikill þrýstingur er á ferðaskrifstofur og ferðaskipuleggjendur að lækka verð í samræmi við gengisfellinguna.

Sé það gert þá fáum við helmingi minni tekjur af erlendum ferðamönnum mælt í erlendum gjaldeyri en í fyrra því ferðaþjónusta er jú útflutningsgrein og tekjurnar eru í erlendum gjaldmiðli. Ef við miðum við gengið í ágúst 2008 og gengið í dag, þýðir þetta að við fáum um 50 prósent minni gjaldeyri af ferðamönnum bara vegna gengishrunsins - síðan á eftir að gefa afslátt!

Ég held samt að ferðaþjónustan á Íslandi eigi eftir að koma út á sléttu árið 2009, þ.e.a.s. færri Íslendingar fara erlendis og eyða minni peningum. Hingað til hafa Íslendingar verið mjög eyðslusamir í útlöndum. Einnig ættu fleiri Íslendingar að ferðast innanlands næsta sumar en í fyrra.

Hingaðtil hafa Íslendingar eytt meiri peningum í útlöndum en erlendir ferðamenn á Íslandi. Það er mjög merkilegt vegna þess að mikill munur er á fjölda ferðamanna frá Íslandi og fjölda ferðamanna til Íslands. Ef við miðum við að fjöldi ferða frá Íslandi sé 150.000 og fjöldi ferða erlendra ferðamanna til Íslands sé 500.000, þá eyðir Íslendingur að jafnaði 3-4x meiri peningum erlendis en erlendir ferðamenn eyða á Íslandi.

Ég spái því að nettóvirði ferðaþjónustunnar verði í kringum núllið árið 2009. Það hljómar kannski ekki svo vel en það yrði góður árangur miðað við síðustu ár þar sem við höfum verið í stórum mínus.

Kv, Stefán