Ferðaþjónusta leggst af tímabundið á meðan ekki er hægt að fljúga til landsins

Hugsum okkur langvarandi eldgos á Íslandi sem kæmi í veg fyrir flug til og frá landinu. Þegar gos í líkingu við gosið í Lakagígum 1783 verður næst á Íslandi er viðbúið því að ferðaþjónusta leggist af tímabundið á meðan á því varir vegna þess að ekki verður hægt að fljúga til landsins vegna gosefna í lofti. 

Við skulum rétt vona að gosið verði að haustlagi þannig að áhrifa þess gæti sem minnst fyrir ferðaþjónustuna í landinu.

Hitt er svo annað mál að ég hef ekki orðið var við áætlanir yfirvalda né einkaaðila til að bregðast við með upplýsingagjöf í tilvikum sem þessum. Ef fólk fær rangar upplýsingar um umfang eldgoss og áhrif þess á samgöngur er mögulegt að það hætti við ferð til Íslands að óþörfu.

Ég legg til að sett verði á laggirnar sérhæfð almannatengslavefsíða fyrir ferðaþjónustuna sem notuð er við krísuaðstæður. Ferðaskrifstofur erlendis gætu nýtt þessa upplýsingaveitu til að gefa viðskiptavinum sínum réttar upplýsingar, og almenningur gæti nýtt sér þessa þjónustu milliliðalaust.

Aukin virkni við Upptyppinga

Athugasemdir

[Börkur Hrólfsson, 21.10.2008 kl. 08:52]

Einhvernveginn held ég, að ef gos í likingu við Lakagíga gosið 1783 verði, þá verðum við með stærri vandamál en áhrif á ferðaþjónustuna.

Ég held að vandamálið verði frekar að koma fólki burt frá landinu, og allri Evrópu jafnvel, að öðrum kosti að grafa nægilega margar grafir.

Gera má ráð fyrir að mannfall í nútíma Lakagígagosi gæti orðið um 60 til 100 þúsund manns, ef ekki tekst að flytja fólk af landi brott, eða gera einhverjar aðrar ráðstafanir til að verjast brennisteins gasinu, sem fylgdi slíku gosi.

Það hefur verið áætlað að Lakagígagosið 1783 (fyrir 225 árum), og harðindi sem fylgdu í kjölfarið, á öllu norðurhveli jarðar, hafi kostað allt að 5 - 6 milljónir manns lífið.

Verði gos við upptyppinga, eða annars staðar, þá skulum við vona að það verði "túristavænt", svona eins og undanfarin 4 Heklugos hafa verið. Þá væri kannski hægt að græða á þeim, ekki veitir af.

B-)

[Börkur Hrólfsson, 21.10.2008 kl. 08:54]

Úps, gleymdi þessu:http://news.bbc.co.uk/1/hi/sci/tech/6276291.stm

B-)

[Baldvin Jónsson, 21.10.2008 kl. 09:00]

1783 voru ekki til staðar margar lausnir til að takast á við slíkar náttúruhamfarir og hungursneyðina sem að þeim fylgdi. Það eru hverfandi líkur á því að jafn margir myndu falla úr hungri í Evrópu í dag Börkur, og féllu veturinn 1784. Ólíklegt að gos við Upptypinga myndi valda annarri Franskri byltingu :)

Annars ákvað ég eftir að hafa séð ítrekað fréttir undanfarið af útflutningstekjum af áli að skoða málið betur. Mér hafa þótt fréttir af tekjum af álinu undarlega háar í hlutfalli af útflutningstekjum okkar undanfarið og ákvað því að greina það aðeins út frá tölum Hagstofunnar hver staðan væri í raun.

Sjá úttekt á http://baldvinj.blog.is

Merkilegt að sjá að álið er vel undir ferðaþjónustu og ekki einu sinni hálfdrættingur á við Sjávarútveginn.

[corvus corax, 21.10.2008 kl. 09:16]

Ef það er eitthvað sem við þurfum núna til að beina athygli heimsins að er það túristagos á aðgengilegu svæði að vetri.

[Marinó G. Njálsson, 21.10.2008 kl. 09:16]

Ef hugmyndir manna um það gos, sem þarna gæti orðið, eru réttar, þá megum við víst frear búast við túristagosi á borð við eldgosin á Hawaii, en hamfaragos á við eldana í Lakagígum.  Menn spá því að þarna gæti helst orðið dyngjugos, en þau standa gjarnan yfir í áratugi.  Stefán Helgi, það verður því nóg að gera fyrir okkur leiðsögumenn að gera í framtíðinni.  (Ég geri ráð fyrir að klára skólann )

Hitt er annað mál, að gjósi einhverju hamfaragosi, þá gætu flugsamgöngu til og frá landinu lagst niður í einhvern tíma.  Þetta er raunveruleg ógn og það er engin ástæða til að gera lítið úr henni, Börkur.  Undanfarin árþúsund hafa þó slík gos frekar orðið sunnan til á landinu.  Bara á síðustu 1.000 árum má nefna gos í Öræfajökli 1362.

Annars er eins og fólk líti alveg framhjá þeirri staðreynd, að Keflavíkurflugvöllur, sem við treystum nær alfarið á varðandi millilandaflug, er á mjög virku gosbelti, sem gýs á um 1000 ára fresti.  Síðasta goshryna hófst þar fyrir um 1000 árum og stóð í vel yfir 200 ár.  Þá runnu þau hraun sem við sjáum á leiðinni milli Hafnarfjarðar og Keflavíkur.  Hvort að hætta á slíkum gosum, sé yfirvofandi, er ekki mitt að dæma, en það er möguleiki sem við þurfum að gera ráð fyrir.

[Stefán Helgi Valsson, 21.10.2008 kl. 23:08]

Takk fyrir þessar athugasemdir drengir.

Börkur, kannski var það óheppilegt að nefna gosið í Lakagígum sem dæmi. Segjum sem svo að gjósi í Heklu og að heimsbyggðin frétti af því í gegnum erlendar fréttaveitur sem hafa litla sem enga þekkingu á aðstæðum á Íslandi. Þetta getur leitt til mjög misvísandi upplýsinga. Eldgos í Heklu hafa ekki verið stór í okkar minnum, en eldgos er eldgos og nafnið eitt getur fengið fólk til að hætta við að heimsækja Ísland.

Það sem ég er að reyna að segja er að þegar eitthvað kemur uppá eins og t.d. eldgos, flóð, jarðskjálfti eða annað sem kemst í fréttirnar erlendis, þá er hætt við að fólk haldi að ástandið sé verra en það er.

Þess vegna legg ég til að við þurfum aðgengilegan upplýsingamiðil, á ensku að minnsta kosti, sem lýsir viðkomandi ástandi svo nákvæmlega að fólk getur tekið upplýsta ákvörðun um að koma til Íslands eða ekki.

[Kjartan Pétur Sigurðsson, 22.10.2008 kl. 20:13]

Mælingar sem hafa verið gerðar sýna að það er ekki mikil kvika þarna á ferð.