Maður handleggsbrotnaði við Geysi

Þrjátíu og fimm ára Breskur ferðamaður handleggsbrotnaði við Geysi á laugardag og fékk aðhlynningu á sjúkrahúsinu á Selfossi. Þar eyddi hann þremur og hálfri klukkustund og fékk ekki verkjalyf fyrr en eftir að búið var að taka af honum röntgenmyndir. Í ljós kom að upphandleggurinn var brotinn. Aðeins einn læknir var á vakt og svaraði hann jafnframt í síma.

Mynd: Hollensk kona féll á stígnum við Gullfoss í síðustu viku. Myndin tengist ekki fréttinni með beinum hætti.

 

„Glerhált var á þeim stað þar sem maðurinn féll,“ sagði Hólmfríður Sigvaldadóttir leiðsögumaður mannsins og undrast yfir því hversu lítið er gert til þess að tryggja aðgengi og öryggi ferðamanna á helstu ferðamannastöðum landsins.  

Að sögn Hólmfríðar hafði maðurinn fyrr um daginn einnig fallið á hálum göngustíg við Gullfosskaffi. Maðurinn er einn síns liðs hér á landi en ferðast í 8 manna hópi á vegum breskrar og íslenskrar ferðaskrifstofu. Hann bíður nú heimferðar. 

„Það er undarlegt að með allt þetta heita vatn sem rennur á yfirborðinu við Geysi að ekki skuli vera hægt að setja hitalögn undir göngustéttina,“ sagði Börkur Hrólfsson leiðsögumaður sem frétti af slysinu.

Hólmfríður sagði manninn hafa kvalist af sársauka í drjúga stund áður en honum voru gefin verkjalyf.

 

Lítið hugsað um ferðamenn

„Þetta er hryllilegt til þess að hugsa hversu lítið er hugsað um þessi svæði. Það voru ábyggilega margir sem duttu bæði við Gullfoss og Geysi þennan dag en sluppu við skrekkinn,” sagði Hólmfríður.  

Að sögn Hólmfríðar er enginn munur á Gullfossi eða Geysi. „Á báðum stöðum er fljúgandi hálka þegar þannig viðrar og enginn mokar, stráir sandi eða salti á hálkubunkana. Fólk styðst við hvort annað á leiðinni niður að Gullfossi og tosar sig upp á kaðlinum sem liggur meðfram stígnum. Það er víst að þarna dettur fólk á hverju ári og slasast meira eða minna.“

„Í raun þyrfti fólk að nota mannbrodda eins og notaðir eru í jöklagöngum. Sjálfri er mér meinilla við að fólk fari niður að Gullfossi þegar er hált. Ég vara fólk við og mælist til þess að fólk fari ekki niður að fossinum en samt fer fólk niðureftir, líklega vegna þess að það gerir sér ekki grein fyrir út í hvað það er að fara. Leiðsögumaður með stóran hóp má þakka fyrir að allir skili sér eftir heimsókn á Gullfoss annars vegar og Geysi hinsvegar.“  

Stefán Helgi Valsson

Þessi frétt birtist fyrst á vefsíðu Félags leiðsögumanna.

Þyrla sækir mjaðmarbrotna stúlku

Athugasemdir

[doddý, 10.3.2009 kl. 21:57]

.. varð svo ekki að vísa manninum í bæinn svo hann fengi það heiður að fá að bíða á slysó líka? svona er allt heilbrigðiskerfið að verða, það besta í heimi að mati stjórnvalda. kv d

[Sólveig Dagmar Þórisdóttir (IP-tala skráð) 24.3.2009 kl. 01:51]

Sæll Stefán.

Ég var að lesa um handleggsbrot breska ferðamannsins og undrast ekki á falli þarna á þessum slóðum þessa helgi, því ég varð fyrir því sama daginn eftir við störf. Var að ökuleiðseigja og féll á svelli á bílastæðinu á Geysi þegar hópurinn var uppi á svæði.

Á þeim fjórtán árum sem ég hef starfað sem fararstjóri hef ég aldrei dottið jafn oft sama daginn eða þrisvar (einnig á bílastæði á Þingvöllum og á bílastæði í Reykjavík í lok ferða) Hópurinn sá mig aldrei detta. 

Ég fór á slysadeildina eftir ferðina og þurfti að bíða í um tvo tíma án verkjalyfja. Ég var ekki röntgenmynduð, en fór tíu dögum síðar í röntgenmyndtöku vegna mikilla bólgna og þrálátra verkja í olnboga og hné. Reyndist ekki brotin sem betur fer!

Er sammála að það mætti vel nýta heita vatnið undir bílastæðin á ferðamannastöðum eins og Geysi. Einnig setja salt á göngustíga reglulega eins og þann sem liggur niður að Gullfossi. Þar hef ég séð fólk hreinlega skríða á fjórum fótum upp brekkuna til að verjast falli. Stórfurðulegt að Umhverfistofnun sinni ekki kröfum okkar sem biðjum um öryggi fyrir ferðamenn og okkur sjálf við störf.  Baráttukveðja Solla.