Yfirmaður landvarða verður að sýna gott fordæmi

Nýráðinn framkvæmdastjóri Vatnajökulsþjóðgarðs hefði betur stutt landvörðinn í þessu máli. Umhverfisstofnun menntar landverði og kynnir fyrir þeim gildandi lög og reglugerðir, þ.á.m. lög um náttúruvernd.

Lögum samkvæmt er utanvegaakstur bannaður.

Yfirmaður landvarðar hefði átt að ganga fram fyrir skjöldu með góðu fordæmi og styðja landvörðinn.

Ætla mætti að landvörðurinn og nýráðinn framkvæmdastjóri Vatnajökulsþjóðgarðs séu í sama liði - en svo er greinilega ekki.

Mun nýráðinn framkvæmdastjóri Vatnajökulsþjóðgarðs hunsa önnur lög og reglugerðir?

Í lögum um náttúruvernd 1999 nr. 44 segir þetta í 17. gr. Akstur utan vega.
Bannað er að aka vélknúnum ökutækjum utan vega. Þó er heimilt að aka slíkum tækjum á jöklum, svo og á snjó utan vega utan þéttbýlis svo fremi sem jörð er snævi þakin og frosin.

Stóð 40 tonna bíla að utanvegarakstri

Leiðsögumaður eða fararstjóri?

Mér finnst mikilvægt að þeir sem ræða um málefni leiðsögumanna geri sér grein fyrir því að starf leiðsögumanna og fararstjóra er ekki það sama.

Það skiptir miklu máli fyrir fagmenntaða leiðsögumenn að vera kallaðir sínu rétta nafni. Kennari sem dæmi vill ekki láta kalla sig skólaliða. Læknir vill ekki láta kalla sig sjúkraliða og svo framvegis.

Yfir 1.000 manns hafa útskrifast frá Leiðsöguskóla Íslands sem fagmenntaðir leiðsögumenn.

Hin formlega skilgreining á starfsheiti leiðsögumanna (tourist guide) annars vegar og fararstjóra og annarra hins vegar, og samþykk er af FEG (European Federation of European Tourist Guide Associations) og WFTGA (World Federation of Tourist Guide Associations), er þessi:

http://www.feg-touristguides.org/pdf/imprimir/documentos/cen.pdf

Fjöldi erlendra ferðamanna og starfsfólks á Íslandi kemur sumum á óvart

Landið liggur undir skemmdum og fjöldi ferðamanna er orðinn slíkur að það er ekki þverfótað fyrir þeim. Nýlega sagði erlendur ferðamaður frá því í viðtali í Kastljósinu að fjöldi erlendra ferðamanna í miðbæ Reykjavíkur hefði komið sér á óvart.

Kannski kemur það einhverjum á óvart að rúmur helmingur starfsfólks í ferðaþjónustu á Íslandi er af erlendu bergi brotið. Væntanlega þyrfti að loka mörgum gististöðum víðsvegar um landið ef ekki væri fyrir harðduglegt erlent starfsfólk sem kemur hingað til sumarvinnu. En er þetta ástand sem Íslendingar óska innlendri ferðarþjónustu?

Uppselt á ferðamannastaði

Frábært framtak hjá Kynnisferðum

Þessi ákvörðun Kynnisferða er frábært framtak! Reyndar er fyrirtækinu málið skylt en í fyrra lést ferðamaður á þerra vegum í fjörunni, þrátt fyrir að leiðsögumaðurinn í ferðinni hefði varað fólk við hættunni.

Viðvörunarskilti gagnast einkum þeim sem koma á ströndina á eigin vegum og án fagmenntaðs leiðsögumanns sem varar við hættunni.

Sjálfur kom ég í fyrra að manni á ströndinni sem búinn var að klæða sig úr fötunum og ætlaði að stinga sér til sunds.

Hressandi sjóbað í Reynisfjöru

Vilja kosta skilti í Reynisfjöru

Eignarnám á landi fyrir ferðaþjónustu

Athyglivert að landið undir Bakkafjöruhöfn verður tekið eignarnámi. En hvað með merka ferðamannastaði eins og t.d. Geysi og Kerið? Samningar hafa staðið um langt skeið milli eigenda landsins umhverfis Geysissvæðið en hafa ekki að mér vitanlega enn gengið eftir. Eigendur vilja e.t.v. meira fyrir landið en ríkið vill greiða. Og hvað um Kerið, einn helsta stoppistaðinn á "Gullhringnum"? Verður Geysissvæðið og Kerið tekið eignarnámi óski eigendur eftir of háu verði?

Land undir Bakkafjöruhöfn verður tekið eignarnámi

Manngerðir hellar á Íslandi eru merkilegir og þá ber að vernda

Á Íslandi eru um 200 manngerðir hellar, ef ég man rétt. Þessar menningarminjar þarf vissulega að vernda og halda á lofti um ókomna framtíð. Íslendinga sjálfir mundu njóta góðs af því ef það yrði gert sem og erlendir ferðamenn. Það gladdi mig að sjá nýtt upplýsingaskilti á íslensku og ensku við Laugarvatnshelli sem sett var upp um daginn.

Merkar menjar um mannavist

Óvænt lokun Kersins kemur illa við ferðaskrifstofur á miðju sumri

„Lokun Kersins kemur eins og skrattinn úr sauðarleggnum og er í hróplegu ósamræmi við kynningu okkar á Íslandi,“ segir Ólafía Sveinsdóttir, deildarstjóri skipadeildar hjá Atlantik. „Við erum varla búin að átta okkur á þessu ennþá en það er ljóst að þessi lokun kemur sér einkar illa á miðju ferðamannatímabili vegna þess að Kerið er inni í öllum okkar ferðaáætlunum á leiðinni að Gullfossi og Geysi.“  

Í sumar eru 70-80 skip á vegum Atlantik í Reykjavík en að meðaltali eru um 1.000 gestir um borð utan áhafnar. Ætla má að 6-700 gestir af hverju skipi fari svokallaðan „Gullhring“ sem er leiðin frá Reykjavík um Þingvelli, Gullfoss og Geysi með viðkomu í Kerinu. Ljóst er að um verulegan fjölda fólks er að ræða. Ólafía bendir á að Atlantik geri áætlanir langt fram í tímann og þar af leiðandi er búið að gera ráð fyrir því að stoppa við Kerið. „Eigendur Kersins taka þessa ákvörðun en þetta er mjög illa gert á miðju sumri. Það hefði mátt gera þetta með meiri fyrirvara, t.d. í lok sumars,“ segir Ólafía. 

Ólafía segist hrædd um að verði gjald innheimt af ferðamönnum fyrir að skoða Kerið, eins og eigendur þess fóru fram á við tvær ferðaskrifstofur, muni aðrir staðir fylgja í kjölfarið. Ennfremur bendir Ólafía á að mismunun sé fólgin í því að banna rútum að stoppa við Kerið en leyfa enkabílum það, eins og eigendur Kersins ætlast til. „Ég kvíði því að gera okkar viðskiptavinum grein fyrir lokun Kersins,“ segir Ólafía.

„Hingaðtil höfum við verið stolt af því að sýna erlendum ferðamönnum þetta sérstaka náttúrufyrirbæri sem Kerið er. Það verða vonbrigði og við verðum að geta gefið haldgóða skýringu á því hvers vegna ekki er hægt að stoppa þarna eins og ráð var gert fyrir.“  

Hvað varðar tímasetningar skiptir það miklu máli að stoppa við Kerið. Verði ekki lengur hægt að stoppa þar riðlast tímasetning allra ferða sem kostar mikla vinnu að endurskipuleggja. „Lokun Kersins þýðir að við þurfum að taka eina náttúruperlu út úr Gullhringnum sem er í hróplegu ósamræmi við kynningu okkar á Íslandi.“ 

Ferðamannastaðir og náttúrperlur séu í eigu opinberra aðila

„Mér finnst rangt að náttúruperla eins og Kerið sé í einkaeigu,“ segir Ólafía. „Við hjá Atlantik erum að sjálfsögðu fylgjandi því að vel sé gengið um ferðamannastaði og náttúruperlur og að þeim sé haldið vel við eins og gert hefur verið við Kerið.“  Ólafía skorar á opinbera aðila að sjá um viðhald umhverfisins við Kerið og annarra vinsælla ferðamannastaða og að tryggja aðgengi að náttúruperlum á Íslandi.  

Hildur Jónsdóttir, eigandi ferðaskrifstofunnar Farvís, segir ákvörðun Kerfélagsins koma sér mjög illa á miðju sumri því fyrirtæki hennar sé búið sé að auglýsa Kerið sem sérstakt stopp á Gullhringnum. Hildur tekur undir sjónarmið Ólafíu að það sé í verkahring opinberra aðila að tryggja aðgengi og viðhald ferðamannastaða.

Þessi grein birtist fyrst á vefsíðu Félags leiðsögumanna

SAF fordæmir arðsemiskröfu eigenda Kersins

Eigendur Kersins vilja njóta arðs af eign sinni og allir rútufarþegar eru velkomnir svo framarlega sem greitt er fyrir þá. Þetta kemur fram í tilkynningu frá Samtökum ferðaþjónustunnar (SAF) sem send var til félagsmanna í tölvupósti í gær.  

Í tilkynningu SAF segir að viðræður talsmanns eigenda Kerfélagsins og fulltrúa tveggja ferðaskrifstofa fyrst og fremst hafa snúist um arðsemiskröfu eigenda en ekki náttúruspjöll eins og eigendur Kersins lýsa nú yfir. Að því að fram kemur í tilkynningunni vekur þetta mál nokkra furðu.  Í fyrsta lagi er kveðið á um það í náttúruverndarlögum að almenningi sé heimil för um landið í lögmætum tilgangi.  Í öðru lagi er undarlegt að mismuna ferðamönnum eftir því hvort þeir eru í rútu eða á einkabíl. Í þriðja lagi hefur Vegagerðin og Ferðamálastofa staðið straum af kostnaði við  bílastæði  við Kerið,  göngustíga  og uppsetningu upplýsingaskilta og er Kerið kynnt sem áfangastaður á heimasíðu Vegagerðarinnar. 

Af framansögðu má álykta að SAF telji eigendur brjóta gegn náttúruverndarlögum og jafnræðisreglu. Auk þess hafi staðurinn notið góðs af opinberu fé og ætti því að vera opinn almenningi.  

Kerfélagið, eigandi Kersins, setur upp bannskilti á íslensku og ensku við Kerið 15. júlí næstkomandi þar sem fram kemur að hópbifreiðum sé óheimilt að stoppa.

 

Fyrr á þessu ári lokuðu eigendur Hindisvíkur á Vatnsnesi bílastæði við hinn fornfræga selaskoðunarstað með keðju og bannskilti með það fyrir augum að fyrirbyggja að bílar, einkum hópferðabifreiðar gætu stoppað. Lesið fréttina, smellið hér.

  

Þessi grein birtist fyrst á vefsíðu Félags leiðsögumanna

Kerið í Grímsnesi: Ferðamenn í skipulögðum ferðum óvelkomnir

2.7.2008. Kerfélagið krefst þess að ferðaskrifstofur og ferðaskipuleggjendur sem leggja leið sína að Kerinu greiði afnotagjald fyrir og segja það gert til að vernda svæðið. Talsmenn ferðaskrifstofa og ferðaskipuleggjenda segja að Kerfélagið ætli sér að græða á Kerinu með því að selja að því aðgang og benda á að slík innheimta skapi slæmt fordæmi sem kæmi niður á ferðaþjónustu á Íslandi.

Kerfélagið hafði samband við tvo stóra ferðaþjónustuaðila fyrir nokkru síðan og bauð þeim að kaupa aðgang að Kerinu fyrir 3-500 krónur fyrir hvern gest. Báðir aðilar neituðu að greiða aðgang að svæðinu. Að óbreyttu munu þessir aðilar hætta að koma við í Kerinu þegar frestur Kerfélagsins rennur út þann 15. júlí næstkomandi.

Annar aðilinn hefur nú þegar tekið Kerið út úr leiðarlýsingum í bæklingum sínum og hinn aðilinn gefur út nýjan bækling þar sem búið er að taka Kerið út, strax um helgina. 

Kerið er vinsæll viðkomustaður innlendra og erlendra ferðamanna og stendur rétt sunnan við Biskupstungnabraut í Grímsnesi á leiðinni frá Reykjavík að Gullfossi og Geysi. Kerið er 6.500 ára gamall 55 metra djúpur gígur með tjörn, 7-14 metrar að dýpt, en dýptin sveiflast í takt við grunnvatnsstöðu svæðisins. 

Sækjumst hvorki eftir tekjum né útgjöldum

„Við höfum ákveðið að loka fyrir aðgang að Kerinu fyrir hópa í skipulögðum rútuferðum frá 15. júlí næstkomandi. Við viljum ekki hindra aðgang almennings um landið en grípum til þessarar ráðstöfunar gagnvart þessum fjölmenna hópi með það fyrir augum að minnka áníðslu á landinu,“ segir Óskar Magnússon, framkvæmdastjóri Kerfélagsins og einn 10-20 eigenda Kersins og landsins umhverfis. 

Óskar neitar því að þessi ráðstöfun hafi fordæmisgildi fyrir aðrar náttúruperlur á Íslandi sem eru í einkaeigu. „Við keyptum þetta land fyrir um átta árum síðan með það fyrir augum að vernda það fyrir átroðningi ferðamanna en ekki til þess aðhafa það að féþúfu. Við sækjumst ekki eftir tekjum en þar af leiðandi sækjumst við ekki heldur eftir útgjöldum. Eftir að við eignuðumst landið beittum við okkur fyrir því að styrkur fékkst frá Ferðamálaráði til að lagfæra umhverfi Kersins sem þá hafði orðið fyrir verulegum spjöllum eftir áralangan átroðning. Nú stefnir í sama farið nema spyrnt verði við fótum.  

Samráð við ferðaskrifstofur

Viðræður hafa staðið í nokkurn tíma milli Kerfélagsins og tveggja stærstu fyrirtækja landsins sem bjóða upp á dagsferðir út frá Reykjavík um að þessi fyrirtæki taki þátt í kostnaði við að halda svæðinu við. 

Óskar segist illa við að þurfa takmarka aðgengi fólks að Kerinu en eitthvað þurfi að gera. „Eðlilegast er að ferðaskrifstofur sem hafa tekjur sínar af því að selja útsýni og skipuleggja ferðir um náttúru Íslands standi straum af viðhaldskostnaði við Kerið og við aðrar náttúruperlur.

.

Það má spyrja sig að því hvort það eigi ekki við hér sem enddranær að þeir sem njóti tiltekinna gæða greiði fyrir þau. Kannanir hafa sýnt að ferðamenn eru almennt tilbúnir til þess ekki síst ef þeir vita að fjármunirnar renna til þess að viðhalda ferðamannastöðum og vernda náttúruna. Við könnuðum áhuga tveggja ferðaskrifstofa á því að greiða fyrir afnot svo unnt væri að halda þessu áfram óbreyttu en sú hugmynd fékk ekki hljómgrunn. 

Bannskiltið tilbúið

Búið er að útbúa bannskilti sem til stendur að koma fyrir við Biskupstungnabraut. Skiltið er rautt og gult á litinn og á því er texti á íslensku og ensku. Eigendur telja sig í fullkomnum rétti að takmarka aðgengi og vísa til sterkrar stöðu eignaréttar á Íslandi. Að svo komnu stendur ekki til að hafa vakt á svæðinu né óska eftir aðstoð lögreglu, heldur höfða til samvisku þeirra sem fara um svæðið og almennrar kurteisi að fara eftir óskum landeigenda.  

Stofnendur Kerfélagsins voru Óskar Magnússon sem gegnir starfi framkvæmdastjóra félagsins, Sigurður Gísli Pálmason, Jón Pálmason og Ásgeir Bolli Kristinsson en eigendur Kersins eru á milli 10 og 20 talsins.  

Viðbrögð Ferðamálastofu og Samtaka ferðaþjónustunnar

Samtök ferðaþjónustunnar (SAF), samtök atvinnurekenda í ferðaþjónustu, lýsa furðu sinni yfir ákvörðun Kerfélagsins að banna fólki í hópbifreiðum að heimsækja Kerið. Í þessu sambandi vísa samtökin til náttúruverndarlaga þar sem kveðið er á um að almenningi sé heimil för um landið í lögmætum tilgangi. Ennfremur benda samtökin á þá undarlegu staðreynd að ferðamönnum sé mismunað eftir því hvort þeir ferðist með rútu eða einkabíl. 

Kerfélagið sendi Ferðamálastofu erindi um fyrirætlanir sínar fyrir nokkrum vikum. Engin viðbrögð hafa komið þaðan enn sem komið er. 

Stefán Helgi Valsson

 

Þessi grein birtist fyrst á vefsíðu Félags leiðsögumanna

Aðgangur að Kerinu í Grímsnesi takmarkaður

Hjólreiðastígar eru tækifæri fyrir ferðaþjónustu

Ég legg til að það verði skoðað hvort ekki megi leggja hjólreiðastíg meðfram Reykjanesbraut, Vesturlandsvegi og svo meðfram öllum hringveginum vegna þess að ég er sannfærður um að slíkan stíg er hægt að markaðssetja fyrir erlenda ferðamenn.

Sívaxandi fjöldi erlendra ferðamanna sem heimsækir Ísland kýs að ferðast um landið á reiðhjóli. Oftast verður vart við hjólreiðafólk á Reykjanesbraut sem síðan dreifist um landið.

Hjólreiðar eru í eðli sínu nátengdar útivist, náttúruvernd, heilsusamlegri hreyfingu, sjálfbærni og fleiri þáttum sem erlendir ferðamenn sækjast eftir þegar þeir heimsækja Ísland.

Akvegirnir tvöfaldaðir en hvar eru hjólreiðastígarnir?